Непријатни сцени пред мечот на Аргентина: Тепачка меѓу навивачи во срцето на Њујорк (ВИДЕО)

Во пресрет на натпреварот од првото коло во групата Ј, кој ќе се игра во Канзас Сити, голем број аргентински и алжирски навивачи се собраа на познатиот Тајмс Сквер. Атмосферата, која првично беше исполнета со песни и навивање, за кратко време прерасна во вербална расправија, а потоа и во физичка пресметка. Видеата што се појавија на социјалните мрежи покажуваат неколку лица кои разменуваат удари пред бројни туристи и случајни минувачи, додека околу нив владее вистински хаос.

Особено загрижува фактот што во непосредна близина на инцидентот имало жени и деца кои дошле да ја почувствуваат мундијалската атмосфера. За среќа, тензиите брзо се смириле и не дошло до поголем инцидент, но сцените од Њујорк уште еднаш покажаа дека големите спортски настани понекогаш носат и несакани навивачки пресметки.

На теренот, Аргентина предводена од Лионел Меси ќе ја има фаворитската улога против Алжир и ќе се обиде со победа да ја отвори одбраната на светската титула, додека организаторите ќе се надеваат дека во продолжение на турнирот вниманието ќе биде насочено кон фудбалот, а не кон случувањата надвор од стадионите.