Ќе биде пеколно под Тумбе Кафе - Пелистер мора да ја победи Струга

Во моментов, битолскиот тим се наоѓа на десеттата позиција која води во понизок ранг, а дополнителен проблем е лошата ефикасност бидејќи на овие шест натпревари постигна само два гола и е без реализација во последните 353 минути активен фудбал. Пелистер е без триумф од 12 февруари кога на домашен терен го совлада Работнички со 4-1. Денеска победата е императив бидејќи Работнички се доближи на само еден бод разлика иако предноста на Пелистер на почетокот од „пролетниот“ дел од првенството беше голема.

Сепак, Струга не е без мотиви на денешниот натпревар. Откако во средата доживеа елиминација во Купот на Македонија од Шкендија, поранешниот шампион се надева дека преку првенството ќе обезбеди пласман на европска сцена, а реално може да се вмеша и во борбата за титулата. Можно е и третото место да води во Конференциската лига, но за да се случи тоа, треба Шкендија да го освои Купот, а тоа ќе се знае дури во мај. Со евентуален триумф во Битола, Струга може да се доближи на пет бода до Шкендија и Вардар и да ја направи крајно драматична ситуацијата на девет кола пред крајот на првенството, а уште повеќе пред меѓусебните дуели на трите првопласирани екипи на табелата.

Натпреварот во Битола се игра од 14:30 часот, а по него, од 24. коло ќе остане само уште утрешниот дуел меѓу Шкупи и Башкими.