Легендарниот Стивен Џерард ќе му биде тренер на Миовски!?

Шкотскиот гигант синоќа го избрка досегашниот менаџер Расел Мартин како последица на очајните резултати од почетокот на сезоната. Ренџерс е на осмата позиција на табелата со осум бода од седум натпревари и негативна гол-разлика (6-7), а чашата ја прели ремито против Фалкирк во мечот во кој тимот од Глазгов водеше со 1-0 со голот на Бојан Миовски.

Џерард беше менаџер на Ренџерс во периодот од 2018 до 2021 година и во последната сезона ја освои титулата во шкотската Премиер лига без ниеден пораз. Двете страни веќе почнале преговори и во текот на денов се очекуваат детални информации во врска со тоа. Џерард е без ангажман откако на 29 јануари годинава го напушти саудискиот клуб Ал Етифак.