Синер освои нова титула, прва по Вимблдон

Во денешното финале, во кое беше апсолутен фаворит, Италијанецот го победи Лернер Тиен од САД, 52. на АТП листата со 2-0 (6-2, 6-2) за само 74 минути игра. Американскиот тенисер воопшто немаше шанси на овој меч, Синер отвори со 5-1 и кратко потоа поведе со 1-0 во сетови, а во вториот сет Тиен некако се држеше до 2-2 по што противникот освои четири гема по ред и дојде до победата.

Ова е втор триумф на Синер во Пекинг откако таму ја освои титулата и во 2023 година, додека лани загуби од Карлос Алкараз во финалето. Интересно е тоа што ова беше само трета титула за Синер во 2025 година, а прва што не е Гренд слем бидејќи досега славеше само на Австралија Опен и Вимблдон. Токму на Вимблдон, пред безмалку три месеци, го освои последниот трофеј, а оттогаш настапи само на два турнира, во Синсинати и УС Опен и на двата беше поразен од Алкараз во финалните дуели.