Македонија ЃП доби и втор стадион, лавовите го (за)купија „Борис Трајковски“ во Маџари!

Малку светски екипи може да се пофалат со примерот на Македонија ЃП, Ѓорчепетровци се единствени во државата што имаат на располагање два стадиони, но тоа не значи преселба од една во друга скопска населба. Тазе прволигашот, предводен од тренерот Бобан Грнчаров, нема да ги игра своите натпревари во Маџари, туку „Борис Трајковски“ ќе го користи за тренинзи во новата сезона.

Прв стадион на Македонија ЃП останува тој во Ѓорче Петров во Скопје, каде што ќе ги играат натпреварите од Првата лига, но и Купот на Македонија.

Македонија ЃП минатата сезона ја помина во Втората македонска фудбалска лига, по што експресно избори враќање во елитата. Се очекува деновиве фудбалерите да заминат за Охрид, каде што ќе ги одработат летните подготовки.