Данска телевизија ја нападна Фалангата, па доби контра-удар од Лазаревски!

18 јануари 2025 - 10:48

Данската телевизија „ТВ2“, позната со аферата на местење на нашиот Драган Начевски кој поради тоа беше сменет од функција во ИХФ, повторно се обиде да направи скандал објавувајќи извештај за натпреварот меѓу Холандија и Македонија од СП во Вараждин, во кој главен фокус беа нивните судии Мадс Хансен и Јеспер Мадсен, како и реакциите на македонските навивачи на нивните неправди.

„ТВ2“ го опиша однесувањето на македонските навивачи како „неконтролирано“, дополнително барајќи потврда за своите ставови преку изјави од македонските репрезентативци. Меѓутоа, Милан Лазаревски даде јасен контра-удар на провокативните прашања, истакнувајќи дека културните разлики не треба да се судат еднострано.

„Можеби е различно и невообичаено кај вас во Скандинавија, но тука тоа не е ништо необично. Не е секогаш најпријатно, но не е ни толку драматично како што изгледа од страна“, изјави Лазаревски.

На прашањето дали е подобро ваквите навивачи да се отсутни од трибините, Лазаревски категорично негираше.

„Секако дека ги сакам на секој меч. Македонските навивачи секогаш ни даваат поддршка, и ако треба нешто да се дискутира, тоа ќе го направиме приватно, не јавно. Никогаш нема да ги критикувам“, дополни пикерот на Вардар.

Ова е уште еден извештај на данската телевизија во кој го истакнува своето критичко гледиште кон балканскиот ракомет, истовремено промовирајќи ја супериорноста на скандинавскиот стил. Акцентот синоќа беше ставен на трибините и револтот на македонските навивачи кон данските судии, наместо на спортските аспекти на теренот.