Навивачите го навредуваа Влаховиќ, тој тргна да се пресмета со „своите“ (ВИДЕО)

15 декември 2024 - 09:47

Јувентус одигра само нерешено на домашен терен во синоќешната пресметка против екипата на Венеција (2-2), која се наоѓа на последното место на табелата, во натпревар од 16-то коло од Серија А.

Ова беше четврто реми по ред за „Старата дама“, што дополнително ја зголеми фрустрацијата кај навивачите. Душан Влаховиќ постигна гол во четвртата минута од судиското продолжение и го спаси Јувентус од пораз, но атмосферата на стадионот беше далеку од славеничка. По завршувањето на натпреварот, фудбалерите на Јувентус се упатија кон делот од трибините каде што се најверните навивачи, но наместо поддршка, беа дочекани со серија навреди. Мета на најголем дел од критиките беше токму српскиот напаѓач.

Според сведоштва од стадионот, еден од навивачите упатил низа навреди кон Влаховиќ, што предизвикало негов емотивен одговор. Влаховиќ му возвратил со гест и неколку зборови, но ситуацијата ја смирил негов соиграч, кој застанал помеѓу него и незадоволната публика.

Србинот, кој оваа сезона е најдобар стрелец на тимот со 11 гола во 19 натпревари, очигледно не успева да ги задоволи критериумите на навивачите, кои се огорчени од слабите резултати и моменталната шеста позиција на Јувентус на табелата.