МЗТ Скопје и трета сезона по ред ќе го има истиот тренер на клупата!

12 јули 2024 - 13:27

Македонскиот кошаркарски шампион, екипата на МЗТ Скопје во новата сезона ќе влезе со „стар тренер“, откако денеска од Аеродром информираа дека е продолжена соработката со досегашниот стратег, Васко Атанасов.

За 30-годишниот стратег ова ќе биде втора сезона која од самиот старт ќе ја почне како прв тренер, а вкупно трета со оглед што шансата за предводење на сино-белата чета ја доби пред самиот крај на сезоната 2022/23. Атанасов веќе има две шампионски титули со тимот од „Јане Сандански“, како и еден трофеј од Купот на Македонија, освоен во февруари годинава на завршниот турнир во Битола. Зад него е и претходно е искуство од самостојно водење екипи и тоа со БАС Академи, Струмица и молдавскиот прволигаш Адмиралс.

Атанасов веќе има осум кошаркари на располагање за следната сезона и тоа новото засилување за „металците“, Американецот Брандон Слај, потоа Хрватот Марко Баковиќ, браќата Дамјан и Војдан Стојановски, кои неодамна ги обновија договорите, како и староседелците Бојан Крстевски, Марин Петков, Андреј Андоноски и Марко Миловановиќ.