Легендарниот Блажевски ѝ се враќа на кошарката – преку лидерот во Третата лига!

06 јануари 2023 - 10:04

Еден од најдобрите македонски кошаркари на сите времиња, Перо Блажевски, по неколку месечната пауза по заминувањето од клупата на Кожув има нов ангажман и тоа по малку необичен – ќе биде дел од стручниот штаб на третолигашот Маџари.

Станува збор за култен скопски тим, кој по 25-годишна хибернација минатото лето се врати на кошаркарската мапа. Маџари е есенски шампион во Третата лига А со скор од осум победи и само еден пораз, со големи шанси да биде меѓу тимовите кои следната сезона ќе бидат дел од второлигашката конкуренција.

„Во новата 2023 година влегуваме со уште поголема амбиции, а вклучувањето на легендарното крило во нашиот стручен тим е само доказ на големата желба за што побрзо напредување кон кошаркарската елита. Блажевски ќе работи заедно со првиот тренер Ивица Палевски и со неговиот помошник и исто така легенда на макбаскетот, Диме Тасовски“, велат од КК Маџари.

Блажевски е еден од кошаркарите со најголем број настапи за репрезентацијата на Македонија, а беше стрелец на победничките поени за МЗТ Скопје во историскиот триумф над Реал Мадрид во 1996 година. Како тренер работеше во вторите тимови на Работнички и МЗТ Скопје, како и во Кожув.