Кошаркарите во Бар ја почнуваат мисијата за бегство од - европското дно!
Некогаш четвртата селекција во Европа повторно се најде во второлигашката кал, па ќе треба против Словачка, Норвешка и Данска да ја мине првата пречка воопшто да дојде до шанса да се вмеша во борбата за настап на континенталниот собир по три години. Шарениот жолто-црвен-состав како голем фаворит влегува во пресметката со Црногорците, но тоа и не е важно со оглед што примарна цел на стручниот штаб е колку-толку да ги воигра кошаркарите пред првите два дуели на крајот од овој месец.
Јончевски ќе мора да настапи без двата најдобри плејмејкери, Ненад Димитријевиќ и Кристијан Николов, кои, наводно, добиле подолг одмор за да се аклиматизираат во своите нови клубови, Уникс Казањ и Коњаспор. Војдан Стојановски традиционално е лидерот на репрезентацијата, а покрај него ќе настапат и Андреј Магдевски, Бобан Стајиќ, Дамјан Робев, Андреј Јакимовски, Стојан Ѓуроски, Бојан Крстевски, Андреј Маслинко, Виктор Ефремовски, Теодор Симиќ, Лука Савиќевиќ, Марко Миловановиќ, како и новото име во националниот тим, Димитар Пандев. Ниту во овој циклус ќе немаме странско засилување, откако Џејкоб Вајли се пресели во Јапонија и стана недостапен за луѓето од нашата федерација.
Засега нема најави за било каков телевизиски или интернет-пренос од овој дуел.