Кошаркарите ја прегазија Ирска и го комплетираа првиот чекор кон ЕП 2029 (ФОТО)

Нашата подмладена селекција покажа срце, желба и апсолутно заслужено дојде до убедлив триумф, кој покажа дека имаме далеку поголем квалитет за да бидеме во вака лошо друштво. Неизвесноста траеше само во првата четвртина, која жолто-црвените силно ја завршија и првпат дојдоа до повисока предност. Набрзо подоцна имавме и двоцифрено водство, со што го најавивме крајниот победник.

Андреј Јакимовски уште еднаш покажа дека е лидер на националниот тим, завршувајќи ја средбата со 19 поени и 13 скока, Виктор Ефремовски додаде12 поени, додека Војдан Стојановски заврши со 10 поени.

Македонија последниот меч од групата ќе го одигра в недела (5 јули) на гости против Луксембург, кој ќе биде од ревијален карактер за избраниците на селекторот Берокал. Вториот дел од претквалификациите за ЕП 2029 почнуваат веќе в август, а месецов ќе се одржи и ждрепката за четирите групи во кои ќе има по три селекции.