Измена пред дуелот со Унгарија: Луканоски првпат во репрезентацијата

20 август 2025 - 09:47

Македонската кошаркарска репрезентација вечерва од 19 часот го игра последниот натпревар од претквалификациите за Светското првенство во 2027 година, против Унгарија на домашен терен.

Екипата од пред три дена е со само 13 кошаркари бидејќи Марко Миловановиќ ја напушти репрезентацијата поради болест, а Адем Мекиќ е повреден. Селекторот Марјан Илиевски одлучи во тимот да го вклучи 19-годишниот Марко Луканоски кој ќе има можност да дебитира во сениорската репрезентација.

Луканоски е еден од најперспективните македонски кошаркари, висок е 210 сантиметри, а лани беше избран во идеалната петорка на Европското јуниорско првенство Б-дивизија на која македонската У18 репрезентација го освои златниот медал.