Дончиќ по елиминацијата со Далас има нова цел – пласман на ЛОИ со Словенија!

08 јуни 2021 - 13:48

Еден од најдобрите кошаркари во НБА изминатава сезонава, Лука Дончиќ, ќе нема многу време за одмор по маратонската плејоф-серија со ЛА Клиперс која заврши со елиминација на неговиот Далас маверикс, со оглед што го потврди настапот за Словенија на претстојните квалификации за Олимписките игри во Токио.

Словенечката селекција ќе настапи во Каунас кон крајот на јуни, каде што ќе се обиде да дојде до првиот настап на олимпискиот турнир.

„Тоа е мојата следна цел, да ја однесам Словенија на Игрите во Токио. Се враќам дома и веднаш ќе почнам да тренирам, така да ќе почекам на одморот“, изјави Дончиќ на завршната прес-конференција по крајот на сезоната со „телињата“.

Словенечкото „чудо од дете“ трета сезона беше носител на играта на Далас и тоа со просек од 27,2 поени, 7,2 скокови и 8,6 асистенции.