„Босанскиот Перо Антиќ“ донира два респиратори и куп средства за дезинфекција!

25 март 2020 - 16:37

Претседателот на Кошаркарската федерација на БиХ, Мирза Телетовиќ, во стилот на најголемите светски спортски ѕвезди даде значајна донација за болница во гратчето Коњич во близина на Мостар, каде што е роден, со цел да им се олесни борбата на лекарите против пандемијата со коронавирусот.

„Босанскиот Перо Антиќ“, според функцијата што ја извршуваат во матичните Куќи на кошарката и според фактот што двајцата беа првите претставници на своите земји во престижната НБА-лига, донира два респиратори како и куп средства за дезинфекција, маски и потребни лекарства. Претходно, голем број други спортисти, како од просторот на поранешна СФР Југославија, така и во цел свет, дадоа свој придонес со цел да се подобрат шансите во борбата против вирусот кој ја блокира целата планета.

Телетовиќ е поранешен репрезентативец на БиХ, кој кариерата ја почна во Слобода Тузла, а потоа, по шест годишно играше во Басконија, во 2012 година се пресели во НБА, настапувајќи за Бруклин нетс. Потоа играше за Феникс санс и Милвоки бакс по што во 2018 година се пензионира.