Сите рекорди кои ги урна Јокиќ во првиот меч од финалето во НБА!

02 јуни 2023 - 09:44

Со уште еден трипл-дабл натпревар (27 поени 14 асистенции и 10 скока), Никола Јокиќ помести неколку граници од минатото на НБА-лигата, рамнејќи се со најголемите на оваа игра.

Во НБА се води статистика за сè и сешто, но малку се хероите кои успеваат да влезат во тие категории, а Јокиќ во синоќешната победа над Мајами влезе во неколку престижни друштва.

- Стана вториот играч, по Леброн Џејмс во последниве 25 години, кој на полувреме на еден финален натпревар имал 10+ поени и 10+ асистенции

- Стана осмиот кошаркар во историјата, кој направил трипл-дабл на почетокот на едно големо финале, но никој меѓу нив не го направил тоа со 27 поени.

- Тој е само вториот кошаркар кој е дебитант во едно финале, а направил трипл-дабл уште во првиот меч. Првиот беше Џејсон Кид против ЛА Лејкерс во 2002 година.

- Јокиќ направи 14 асистенции, што е убедливо најмногу асистенции за еден центар во историјата на НБА финалињата.

- Досега само двајца кошаркари откако постои НБА-лигата во текот на еден плејоф имале 450+ поени, 200+ скока и 150+ асистенции. Тоа се Лери Бирд и Леброн Џејмс. Третиот е Никола Јокиќ.

За Јокиќ ова е деветти трипл-дабл во плејофот оваа сезона, а има вкупно 15 во кариерата. Ако го одржи ова темпо, теоретски, уште следната сезона може да ги загрози Леброн Џејмс со 28 и Меџик Џонсон со 30, кои водат на листата со најмногу трипл-дабл остварувања во плејоф.