Лејкерс ќе се засили со уште еден ветеран кој 10 години играше за Клиперс

04 септември 2021 - 13:13

Лос Анџелес Лејкерс во следната сезона ќе влезе со тим составен од ветерани. Тимот од Градот на ангелите создава екипа околу Леброн Џејмс, кој е предводник, а поголем дел од кошаркарите кои потпишаа веќе одамна го имаат прославено 30. роденден.

Меѓу нив најверојатно ќе се најде и 33-годишниот центар ДеАндре Џордан, кој од вчера не е член на Бруклин нетс.

Бруклин го испрати Џордан во Детроит, но искусниот центар веднаш потоа остана без договор и сега има намера да потпише едногодишна соработка со Лејкерс вредна 2,6 милиони долари.

Во минатото Џордан играше 10 сезони за Лос Анџелес клиперс, а настапуваше уште и за Далас, Њујорк и Бруклин. Во кариерата има просек од 9,4 поени и 10,6 скокови по меч.