ТФТ го „зграпчи“ пехарот на првиот меморијален турнир „Анте Дуковски“!

12 септември 2021 - 22:00

Кошаркарите на ТФТ се победници на првото издание од меморијалниот турнир „Анте Дуковски“, кој изминативе денови се играше во Скопје во чест на прерано починатиот тренер на МЗТ Скопје и на повеќе младински репрезентативни селекции.

Составот од скопско Тафталиџе во големото финале убедливо го совлада новиот прволигаш Феникс (106-83), во меч во кој клучната предност беше обезбедена во третиот период. Хортон беше најдобар стрелец во победничкиот тим со 26 поени, додека Бродвеј реализира 19 поени, а Маслинко и Ташовски постигнаа по 14 поени. Куртис Џоунс беше незапирлив во редовите на Феникс 2010 со 35 поени, а репрезентативецот Митревски додаде 17 поени.

Третото место ѝ припадна на Академија ФМП, која во „малото финале“ го совлада Куманово (75-71). На турнирот настапија уште и Работнички и Ангели, кои испаднаа во фазата по групи.