Ташовски првпат во кариерата ќе заигра во странство

03 август 2026 - 19:46

Македонскиот репрезентативец Виктор Ташовски за првпат во својата кариера ќе настапува надвор од границите на Македонија. По одличната сезона во дресот на ТФТ, 24-годишниот плејмејкер постигна договор со хрватскиот премиерлигаш Дубровник.

Ташовски беше еден од најзаслужните за успешните настапи на ТФТ во изминатата сезона, а неговите квалитетни партии не останаа незабележани. Хрватскиот клуб, кој минатата сезона го освои петтото место во регуларниот дел од првенството и стигна до полуфиналето на плејофот, ќе биде првиот интернационален предизвик во кариерата на македонскиот репрезентативец.

Во домашниот шампионат минатата сезона, Ташовски настапи на 31 натпревар и бележеше просек од 15,8 поени, 3,3 асистенции и 1,3 украдени топки по меч. Со таквите бројки ја одигра најдобрата сезона во својата досегашна кариера, а добрата форма ја пренесе и во репрезентативниот дрес, каде што беше еден од лидерите на националниот тим во претквалификациите за Европското првенство.

Заминувањето на Ташовски претставува уште еден сериозен удар за ТФТ во текот на летниот преоден рок. Претходно клубот остана и без искусниот Дерин Говенс, кој се пресели во редовите на Работнички, па составот од Тафталиџе ќе мора да бара нови решенија на бековските позиции пред стартот на новата сезона.