Пелистер се подготвува дури во Требиње, Илиевски договори пет силни теста во БиХ (ФОТО)

14 септември 2020 - 10:00

Кошаркарите на Пелистер, помалку невообичаени, втората фаза од подготовките за новата сезона ќе ја одработат во босанскиот град Требиње, каде што освен на подобрувањ ена физикалиите, ќе работат и на тимската хемија, но и на техниката и тактиката.

Новиот тренер Марјан Илиевски на располагање има многу нови играчи, меѓу кои се репрезентативците Бојан Трајковски и Бобан Стајиќ и четворица нови странци и тоа Aмериканците Џастин Мартин, Чез Вилијамс и Џалил Абдул Басит, заедно со Србинот Игор Кесар, поради што ќе му треба време тимот да се воигра и да биде максимално подготвен за првенството кое почнува на почетокот од октомври.

Битолчани за време на престојот во БиХ ќе одиграат пет пријателски натпревари со цел да видат до каде се и тоа против Леотар (двапати), ХКК Чапљина, поранешниот АБА2-лигаш Зрински како и против поранешниот член на јадранската елита, ХКК Широки, а веќе неколку сезони дел од АБА2.

Прв противник на Пелистер во новата сезона од македонската Прва лига ќе му биде Кожув.