Навико Академија ФМП се трансформираше во АД - ќе игра во Првата лига

Скопскиот тим лани имаше одлични резултати, кога заврши на третото место на табелата во регуларниот дел од сезоната и беше полуфиналист во Купот, но потоа поради административни проблеми и неможноста да се пререгистрира во Акционерско друштво клубот беше префрлен да игра во плејаутот. Си заминаа голем дел од играчите, како и тренерот Александар Петровиќ, кој седна на клупата на МЗТ Скопје.

Сега проблемите се надминати и од Академија ФМП очекуваат добри резултати.

„Трансформацијата од здружение на граѓани во Акционерско Друштво е успешно направена се со цел нашиот клуб да продолжи да се натпреварува во Првата лига и во наредната сезона. 

Во минатата сезона нашиот клуб успеа да заврши на 3-тата позиција на табелата во регуларниот дел и да настапи во полуфиналето на Купот на РМ, при што ја имаше својата најуспешна сезона, но за жал поради административни проблеми и немањето можност да се пререгистрира во АД во временскиот рок за минатата сезона, истата ја завршивме со настап во Плеј-Аут лигата.

Целта за оваа натпреварувачка година е стабилизација на финансиски и организациски план и давање шанса на млади домашни играчи, на кои ќе бидат приклучени неколку домашни и странски искусни играчи.

Тренер на екипата останува Никола Божиноски, кој го наследи на клупата Александар Петровиќ кој премина во редовите на МЗТ Скопје Аеродром“, се вели во соопштението на клубот.