Мираковски: Не можам да го простам незалагањето, можно е да има промени во тимот!

24 ноември 2019 - 20:37

Поранешниот кошаркарски репрезентативец на Македонија, Димитар Мираковски, по лошо ќе го памети своето прво вечно дерби како тренер на Работнички, откако неговиот тим вечерва беше збришан од МЗТ Скопје (68-93) и тоа среде „Градски парк“.

Популарниот Мите самокритично го анализираше натпреварот.

„Поразот од дебитантот Академија ФМП не боли колку што нѐ боли вечерашниот неуспех против најлутиот ривал. Факт е дека формата и квалитетот се на страна на МЗТ Скопје, но не можам да го простам незалагањето на моите кошаркари. Сме имале и три пати послаба екипа од ривалот, па сме го победувале. Можно е да има промени и некои дополнителни засилувања, ќе одлучиме од утре што ќе правиме“, изјави Мираковски.

Една од опциите за експресно засилување е репрезентативецот Марко Симоновски, кој во моментов е слободен кошаркар, откако пред неколку дена го раскина договорот токму со МЗТ Скопје.