Чудо во Струга: Кошаркар на Црн Дрим постигна 88 поени - без ниту една тројка (ФОТО)

29 октомври 2023 - 11:48

Македонската кошарка добива уште еден голем талент, барем ако се суди според неговите досегашни игри во својата возрасна категорија, откако 13-годишниот стружанец, Дион Шабани, завчера постигна неверојатни 88 поени во победата на екипата на Црн Дрим во пресметката со Феникс (94-90) во првенството за играчи до 14 години.

Успехот да биде поголем, кошаркарот од Струга го ова неверојатно поентерско остварување дојде без ниту една постигната тројка, а со 22 прецизно изведени слободни фрлања.

„Премногу сум возбуден бидејќи се уште не си верувам дека успеав да постигнат толку многу поени на натпреварот. Овој рекорд ќе биде голем мотив за мене и моето семејство да работиме и да стигнеме таму каде што сакам да се најдам, а тоа е врвот. Ќе работам напорно да станам кошаркар во целосна смисла на зборот“, изјави Шабани за Клан Македонија.

Талентираниот кошаркар веќе е добро познат на предводниците на македонската кошарка, со оглед што веќе беше дел од повеќе репрезентативни акции и кампови под капата на КФМ. Оттаму од него очекуваат да продолжи напорно да работи и да се развива и за неколку години да се најде и во сениорскиот национален тим, каде што би можел да ги „кине мрежичките“ како што го правеше тоа на мечот против Феникс.