Сузуки неочекувано: Кризата и немаштијата нѐ избркаа од Мото ГП!

12 мај 2022 - 12:09

Тимот на Сузуки, еден од најдобрите во Мото ГП шампионатот, по крајот на сезоната најверојатно ќе стави крај на учеството во ова натпреварување, откако денеска тоа го најавија челните луѓе од оваа екипа.

Тие потоа преку соопштение ги објаснија причините за ваквата одлука.

„Сузуки мото корпорејшн ги почна разговарите за повлекување од Мото ГП-шампионатот на крајот на 2022 година. Тешката економска ситуација, за жал, донесе големи проблеми во автомобилскиот свет, а тоа се одрази и на нас. Принудени сме да ги намалиме трошоците и човечките ресурси за развој на нови технологии. Сакаме да му се извиниме на нашиот тим и на сите кои го поддржуваа Сузуки во изминатите години, а особено на навивачите кои секогаш беа со нас“, се вели во соопштението.

Шампионатот во Мото ГП продолжува викендов со трка за Големата награда на Франција во Ле Ман.