Пред мечот во Рига: Во Шкендија прво сакаат да скокнат, па да кажат – оп!

Тетовци беа елиминирани од словенечка Мура, додека летонскиот шампион од Малме и тоа во речиси изедначен двомеч. Тренерот на македонскиот првак, Ернест Ѓока, е свесен дека за противник има силен тим и дека неговите избраници мора да бидат претпазливи цело време. Тие не сакаат однапред да говорат за вториот меч, туку сакаат прво да си ја завршат работата во Рига.

„Рига е шампион на Летонија и е силен и компактен тим, кој сака да игра офанзивно и има амбиции исто како и нас во ова натпреварување. Ги познаваме до детал и ако одигра,е како што знаеме, може да ги исполниме очекувањата. Има два натпревари и мора да бидеме солидни на овој дуел. Прво да скокнеме, односно да си ја завршиме задачата во Рига, а потоа ќе кажеме оп, односно ќе говориме за реваншот“, изјави Ѓока.

Речиси идентични размислувања како тренерот има и капитенот, Арменд Алими.

„Сигурно е дека чека неизвесен дуел со Рига. Знаеме дека се шампиони и дека имаат квалитетен тим, мора да сме свесни дека ништо нема да се одлучи на овој прв натпревар. Реваншот во Скопје е многу важен, но прво тука мора да ја завршиме работата. Мора да бидеме паметни и да знаеме што сакаме од почетокот“, изјави Алими.

Натпреварот меѓу Рига и Шкендија се игра в четврток со почеток од 19 часот, а македонскиот европретставник нема да може да смета на Бруно Дита, Јан Кривак и Леард Садриу.