Двајца фудбалери на Реал побарале да не шутираат пенали
Одговорност презедоа играчи кои не се главни ѕвезди во тимот, како Лукас Васкез, Начо и Антонио Ридигер, а останатите двајца беа Лука Модриќ и Џуд Белингам. Можеби беше и логична ваквата постава ако се знае дека Родриго и Винисиус не беа во игра до крај, па не можеа да бидат изведувачи, но помошниот тренер Давиде Анчелоти по мечот откри дека имало и двајца што одбиле, односно побарале да не шутираат. Станува збор за Федерико Валверде и Едер Милитао, првиот играше 120+ минути, а вториот влезе во второто продолжение.
„Федерико требаше да биде петти изведувач, но ми рече дека е преморен, па затоа одлучивме место него да шутира Ридигер“, рече Анчелоти помладиот.
Милитао замолил да не шутира поради противничкиот голман Едерсон. Двајцата се бразилски репрезентативци и чуварот на мрежата на Манчестер Сити добро знае како би шутирал тој.