Сити го врати голманот со кој се раздели пред една деценија

Искусниот голман пристигнува од Марсеј, а со англискиот клуб потпиша двегодишен договор.

Според новиот договор, Рули ќе биде играч на Манчестер Сити до летото 2028 година, додека британските медиуми наведуваат дека трансферот е вреден околу 1,7 милиони фунти.

За 34-годишниот Аргентинец ова нема да биде прво искуство во редовите на Сити. Рули веќе беше член на Манчестер Сити во сезоната 2016/17, но тогаш не забележа ниту еден официјален настап за првиот тим.

Речиси десет години подоцна се враќа во Манчестер како многу поискусен голман, зад кого се настапи во неколку големи европски лиги, но и значајни успеси со репрезентацијата на Аргентина.

Рули досега осумпати го бранеше голот на сениорската репрезентација на Аргентина, а беше дел од тимот кој во 2022 година ја освои титулата светски шампион, како и од селекцијата која две години подоцна стигна до трофејот на Копа Америка.

Во Сити пристигнува за да биде втор голман и резервна опција за Донарума.