Њу Орлеанс ноќеска домаќин на најголемиот спортски спектакл – не е фудбал или кошарка!

Во ноќта меѓу недела и понеделник по македонско време, ќе се одигра 59-то издание на најзначајниот натпревар во американскиот фудбал, а љубителите на НФЛ со нетрпение ја очекуваат битката меѓу актуелниот шампион Канзас Сити Чифс и Филаделфија Иглс.

„Шефовите“, предводени од Патрик Махоумс, се пред историска можност – доколку победат, ќе станат првиот тим кој освоил три титули во низа. Ова е нивно петто финале во последните шест сезони, што јасно покажува доминација во НФЛ. Сепак, многу критичари сметаат дека тимот има судиска наклонетост, особено по контроверзната одлука на финалето во 2022 година, кога токму Канзас ја победи Филаделфија со 38-35.

Иглс, пак, влегуваат во ова финале со најдобрата одбрана во лигата. Тимот на Ник Сиријани ја изградил својата игра врз железната дефанзива и исклучителниот тркач Сајкон Баркли, кој оваа сезона постигна преку 2.000 јарди. Филаделфија покажа конзистентност во текот на сезоната, победувајќи 12 од последните 13 натпревари.

Иако Чифс се познати по својот напаѓачки потенцијал, нивниот квотербек Махоумс не блескаше во регуларната сезона. Ова беше негова втора најслаба година во кариерата, но искусниот тренер Енди Рид знае кога да го извади најдоброто од својот тим. На другата страна, Иглс имаат дефанзивен бедем што ретко прави грешки, но нивната игра во нападот со додавање не е на завидно ниво.

Канзас е благ фаворит поради својата искуственост, но Иглс имаат мотив за одмазда и одлично балансиран тим. Дали Чифс ќе испишат историја или Филаделфија ќе се врати на врвот? Одговорот ќе го дознаеме во спектаклот во Њу Орлеанс.