Нејмар: Би било лудо повторно да заиграм во ист тим со Меси и Суарез!

08 јануари 2025 - 10:54

Бразилската фудбалска ѕвезда, Нејмар, иако изјави дека е среќен со неговата кариера и моменталниот престој во Саудиска Арабија, каде што го носи дресот на Ал Хилал, најавува дека би немал ништо против да биде дел од иста екипа со поранешните соиграчи од Барселона.

Тој потенцира дека тие се уште се пријатели и дека често комуницираат.

„Среќен сум во Ал Хилал и во Саудиска Арабија, но фудбалот е полн со изненадувања. Би било неверојатно да играм повторно со Лионел Меси и Луис Суарез. Тие се мои пријатели и сè уште сме во контакт. Повторното обединување на нашето трио би било навистина интересно,“ рече Нејмар, коментирајќи ги гласините за потенцијална соработка со двете големи ѕвезди во Интер Мајами, каде што тие настапуваат.

Бразилецот се пресели во Ал Хилал во 2023 година од ПСЖ, но досега одигра само седум натпревари поради повреди. Тој објасни дека трансферот во Саудиска Арабија бил најдобриот избор во тој момент, бидејќи преминот во МЛС бил невозможен.

„Кога заминував од ПСЖ, преодниот рок во САД веќе беше затворен. Проектот што ми го понудија во Саудиска Арабија беше одличен не само за мене, туку и за моето семејство“, дополни Бразилецот.

Нејмар е еден од најистакнатите фудбалери во бразилската репрезентација, со 128 настапи и 79 голови во националниот дрес.