Лос Анџелес не успеа да ја одбрани МЛС титулата, Кјелини најави крај на кариерата

10 декември 2023 - 11:51

Колумбус Кру е нов шампион на САД откако во синоќешното финале го победи Лос Анџелес со 3-0 и трет пат во својата историја ја освои титулата во МЛС.

Натпреварот во Охајо би можел да биде последен за легендарниот италијански стопер Џорџо Кјелини кој на прес-конференцијата по мечот најави можно пензионирање.

„Ова беше прекрасно патување, а во финалето еден мораше да загуби. Денешниот натпревар може да биде последен во мојата кариера, треба да одам дома и добро да размислам, сам и со семејството, што да правам. Не сакам да донесам одлука, а потоа да ја сменам“, изјави Кјелини.

Во август, тој ќе наполни 40 години, а во 2022 го засили Лос Анџелес, по 17 сезони во тимот на Јувентус. Со торинскиот клуб освои девет титули во Серија А, пет во Купот на Италија и пет во Суперкупот, а два пати играше и во финалето од Лигата на шампионите. Трофеј има и со Лос Анџелес со кого лани ја освои титулата во МЛС.