Инвазија на Мароканци во Доха – ќе има 45.000 на стадионот против Франција

12 декември 2022 - 22:36

Преку 30 „џамбо-џетови“ ќе летнат од Мароко задутре за историското полуфинале на „лавовите“ против светскиот првак Франција, па на стадионот „Еџукејшн сити“ ќе има атмосфера како да се игра во Рабат, Маракеш или Казабланка.

Според последните најави се очекува околу 45.000 Мароканци да бидат на трибините на стадионот, повеќе од десетпати повеќе од Французите чија бројка нема да надмине повеќе од 4.000 навивачи за пресметката за финале на 22-от Мундијал.

Мароканците и Аргентинците се најбројни меѓу навивачите во Катар, па со своето навивање ќе се обидат да бидат 12-ти играч во битката за финале.

Во Мароко, пак, се очекува сите да излезат на улица и да го гледаат мечот во очекување на нова историја и финале. Мароко е првата африканска земја која игра полуфинале на едно Светско првенство, зашто досега најдобар пласман трипати беше четвртфиналето.