Енцо Фернандез: Секое дете сонува за овој дрес и гол на СП, мене тој сон ми се оствари!

Новиот аргентински бисер Енџо Фернандез, фудбалерот за врска на Бенфика кој есенва го сврте вниманието на најголемите европски гиганти, стана вториот најмлад „гаучос“ кој дал гол на Светско првенство, после Лионел Меси, откако вечерва со голчиште ја потврди победата против Мексико со 2-0.

Фернандез вторпат во Катар влезе од клупата за резерви и според играта веројатно за Полска си обезбеди и првотимски статус, но неговиот гол за потврдување на победата е остварување на сонот на секое аргентинско дете кое ќе почне уште од мали нозе да се дружи со „бубамарата“.

„Секое дете го сонува овој дрес и гол на Светско првенство. И јас сонував дека ќе бидам аргентински репрезентативец, дека ќе го носам овој дрес на Светско и дека ќе дадам гол. Сега тој сон ми се оствари“, рече Фернандез.

„Пресреќен сум, зашто победивме и заслуживме! Ова е победа за цела Аргентина, за сите што нѐ поддржуваат, тие што дојдоа тука, тие што во татковината нѐ гледаат. Оваа победа е за нив. Оваа група на играчи е решенана најдобар начин да ја презентира Аргентина, сакаме уште една победа која е многу важна за нас“, додаде младиот фудбалер зза врска.