Скопската арена конечно добива врвен „тепих" (ФОТО)

23 октомври 2023 - 21:27

Националната фудбалска арена „Тодор Проески“ влегува во завршна фаза на имплементирање на новата тревна површина на теренот, која би требало да биде модерна, достојна за натпревари од највисоко ниво на УЕФА и на ФИФА и што е најважно - трајна.

Процесот кој почна на стартот на месец октомври сега и на голо око покажува врвни резултати, бидејќи уште недоместен новиот слој трева изгледа импресивно. Станува збор за хибридна трева, мешавина од вештачка и природна, која треба да има многу поголем животен век, од досегашната, исклучиво природна. 

Ова е прво целсоно менување на тревната подлога на најголемиот фудбалски стадион во Македонија, по 2012 година, а се врши во колаборација меѓу АД за изградба и стопанисување со станбен простор и со деловен простор од значење за Републиката  и Фудбалската федерација на Македонија. Проектот е донација од ФФМ, преку УЕФА и се проценува дека вреди 400.000 евра.

Арената „Тодор Проески“, за жал, излезе во повеќето европски и сите италијански медиуми со својот потпросечно лош изглед, пред натпреварот Македонија - Италија, на 9 септември. Тоа веројатно го катализира процесот за ставање нова подлога, на време за мечот Македонија - Англија, на 20 ноември.