Шпанија ја заплени македонската опрема, откажан тренингот на репрезентацијата!

12 ноември 2019 - 11:39

Македонската репрезентација за фудбалери до 21 година не го одржа синоќешниот тренинг во градот Алкоркорн во пресрет на задутрешниот квалификациски дуел против Шпанија (19.45), а причината за тоа е бизарна – целата опрема на нашиот избран тим била задржана на аеродромот.

Техничкиот менаџер на националниот состав заедно со економите до полноќ останале на аеродромот, но не успеале да ја „извлечат“ опремата, а воедно не добиле ниту информација каков документ е потребен да се обезбеди за да се случи тоа. Од шпанска федерација одговориле дека не знаат за некој нов закон и барање некаква декларација за носење и подигнување спортска опрема, а од ФФМ информираат дека немале добиено никаков допис за дополнителна документација.

За овој во најмала рака скандалозен случај е информиран е делегатот на натпреварот, како и амбасадата на Македонија во Шпанија. И покрај инсистирањето на нашите претставници на аеродромот да пристигне претставник и од шпанската фудбалска федерација, тоа не се случило дури и по чекање од пет часа.