Вториот голман на ПСЖ во тешка состојба – паднал од коњ!

28 мај 2023 - 15:06

Вториот голман на француски Пари Сен Жермен, Серхио Рико се наоѓа во тешка и животно-загрозувачка состојба откако утринава паднал од коњ и хоспитализиран е со тешка повреда на главата во клиника во Севилја.

Рико синоќа беше резерва на мечот на ПСЖ со Стразбур (1-1) по што формално парижаните само ја заверија шампионската титула и по мечот веднаш заминал во татковината, а утринава на јавање во Андалузија доживеал сериозна несреќа после која со хеликоптер итно бил префрлен во болница.

„Во тешка состојба е“, објави портпаролот на ПСЖ.

Според информации на медиумите, Рико е ставен на апарати за да го одржуваат во живот, а тој има тешка повреда на главата.

Несреќата се случила во близина на својата куќа во Ел Росио во покраината Уелва. Рико во ПСЖ дојде во 2019 година од Севилја и за парискиот гигант има 24 меча.