Во Јувентус требаше да дојде Роналдо, за по 60 години да дочекаат стрелец на 25 гола во сезона

05 јули 2020 - 08:00

Португалскиот ас Кристијано Роналдо се запиша вчера во историјата на „старата дама“ откако стигна до бројката од 25 гола сезонава во Калчо-лигата и со тоа израмни рекорд стар 60 години.

Верувале или не, ама до вчера недопирлив во Јувентус беше легендарниот Омар Сивори, кој во 1960/61 успеал да даде 25 гола во една сезона и цели шест децении во Торино се чекаше за да дојде голгетер кој ќе го достигне Аргентинецот и тоа успеа да го направи најскапиот фудбалер што воопшто дошол во „старата дама“.

Роналдо во градското дерби со Торино првпат погоди од слободен удар после две ипол години и 43 обиди, а Јувентус со седум бода предност пред Лацио сега е на вистинскиот пат за деветта шампионска титула во низа.