Ван Гал удри по бившиот клуб: Ајакс ја користи пандемијата за да (у)лови во матно!

06 април 2020 - 10:07

Легендарниот холандски тренер, Луис Ван Гал, смета дека неговиот поранешен клуб Ајакс на грд начин сака да го злоупотреби коронавирусот во сопствени цели, а тоа е административно освојување на шампионската титула.

Директорот на тимот од Амстердан, Марк Овермарс, јавно побара од холандскиот сојуз официјално да го прекине првенството и да го прогласи неговиот тим за нов првак.

„Кога ќе ја добиеме битката со коронавирусот, првенството мора да се заврши на спортски начин. Не може да се одиграат само 25 кола и некој да каже дека Ајакс е шампион, особено не кога има ист број бодови со друг тим. Челниците на составот од Амстердам сакаат да ја искористат кризата за да ја добијат титулата на подарок, а тоа го оправдуваат со грижа за граѓаните. Не се согласувам со таквото однесување“, изјави Ван Гал.

Ајакс има ист број бодови како и АЗ Алкмар (56), а е лидер на табелата само поради подобрата гол-разлика, што е главната причина за револтот не само кај Ван Гал туку и кај многу други во холандскиот фудбал.