Се подготвува „бомба“ на Островот: Мурињо по трет пат на клупата на Челси!?

Жозе Мурињо наводно е отворен за враќање на клупата на Челси. Откако Енцо Мареска беше отпуштен поради низа лоши резултати, лондонскиот клуб бара ново решение, а името на „Специјалниот“ е повторно во игра. Иако неговото име моментално не се спомнува меѓу официјалните кандидати на Стемфорд Бриџ, информациите сугерираат дека Мурињо е подготвен да ја напушти клупата на Бенфика без многу размислување и да се врати во Лондон доколку дојде вистинскиот повик.

„Жозе Мурињо сака да се врати на позицијата менаџер на Челзи и е подготвен да ја преземе улогата доколку биде контактиран. Челси е неговата најголема љубов, но се чини дека ова чувство не е взаемно. Челси сака современ тренер“, тврдат англиските медиуми.

И покрај богатата историја и силните емоции, се чини дека раководството на клубот се стреми кон поинаква насока, па враќањето на Мурињо засега е повеќе во сферата на романса отколку во вистински планови. Мурињо го водеше Челси во два наврата, првпат пристигна во 2004 година и, во соработка со Роман Абрамович, го врати клубот на врвот на англискиот фудбал по половина век чекање, а си замина во 2007 година. Вториот мандат започна во 2013 година и заврши во зимата 2015 година по пад на резултатите. Во синиот дел од Лондон, тој освои три титули во Премиер лигата, ФА Купот, три Лига Купа и Комјунити Шилд.

Ако, сепак, го преземе Челси, тоа ќе биде трет тим за Мурињо оваа сезона. Португалскиот стручњак почна на клупата на Фенербахче од каде брзо беше заменет откако не успеа да го однесе тимот во Лигата на шампионите, а потоа ја презеде Бенфика, клубот каде што ја почна својата тренерска кариера.