Роналдо открива сè - ги нападна размазените дечишта и ги подбра легендите Невил и Руни (ВИДЕО)

Откако крена голема прашина дека не го почитува тренерот Ерик Тен Хаг, дека луѓе во клубот работат да го избркаат, а дека Манчестер јунајтед и газдите Мурдок ги интересираат само парите, а во фудбалски дел гигантот е заостанат, Роналдо ги подбра и младите фудбалери, ама и легендите како Гери Невил и Вејн Руни.

Откри и дека бил на чекор до Манчестер сити ланското лето, дека „граѓаните“ многу се труделе да го донесат од Јувентус, но на крај пресудила љубовта кон својот порашенен клуб и пред сѐ разговорот со неговиот учител сер Алекс Фергусон.

„Манчестер јунајтед нема напредувано од последниот пат кога бев тука. Во моментов е многу поназад од големите клубови како што се Ливерпул и Манчестер Сити. Воопшто не се работи на условите во клубот и неспоредливо е со тоа какви се во Реал Мадрид и Јувентус“, рече Роналдо.

„На младите фудбалери воопшто не им е важен фудбалот. Имаат одличен пример во мене, а на нив им се важни други работи“, додаде Роналдо.

А, на крај ги подбра Невил и Руни посочувајќи дека се обидуваат со критики кон него да добијат на – популарност!

„Гери Невил и Вејн Руни со тоа што ме критикуваат добиваат на популарност. Не знам можеби ми се љубоморни. Не сум другар со нив, со нив бев колега и тие се само дел од моето патување. За разлика од нив Рио Фердинанд и Рој Кин се секогаш на моја страна. Кин е најдобриот капитен кој некогаш сум го имал“, посочи Роналдо.

Целиот прв дел од интервјуто трае безмалку 50 минути.