Покетино се изнервира од однесувањето на своите фудбалери: Следниот пат сите ќе „летате“

„Сините“ славеа со 6-0, но убедливиот триумф остана во сенка на инцидентот што се случи во второто полувреме. Челси доби удар од 11 метри, Палмер тргна да изведе, но Мадуеке и Џексон се обидоа да му ја земат топката по што почна туркање пред белата точка. Палмер претходно постигна хет-трик, а Мадуеке сакаше да се запише во листата на стрелците и којзнае што ќе се случеше ако не притрчаше капитенот Конор Галагер да му овозможи на младиот фудбалер да го шутира пеналот. За Покетино, ваквото однесување е срамно и фрла сенка на убедливата победа.

„Следниот пат сите ќе 'летате' надвор. Не се шегувам. Ова е последен пат да направите вакво нешто, невозможно е после вакво издание да имаме срамно однесување. Ова е детски. Пред се, сакам да истакнам дека играчите, стручниот штаб и и сите во клубот знаат дека Кол Палмер е прв изведувач на пеналите“, порача, меѓу другото, Покетино.

Во врска со ситуацијата се огласи и Палмер кој потврди дека е прв изведувач на пеналите, но додаде дека инцидентот на теренот не оставил последици во соблекувалната каде атмосферата била одлична.