Илиев на лето оди на заем за да има поголема минутажа?
Струмичанецот, кој од 2012 година е дел од Арсенал, сезонава беше прв избор во резервниот тим, есенва е трет голман на „топчиите“, но нема настап за првиот тим, а веќе ќе наполни 25 години и потребни му се минути на сениорски план за да фати уште поголем ритам.
„Илиев е прв избор за резервниот тим на Арсенал, имаше извонедни одбрани и настапи, но и настапи кои не се убедливи. Сепак, на ова ниво, јасно е дека му се потребни сениорски настапи и можно е Арсенал да се реши да донесе ветеран за трет голман, а Македонецот, како и Мет Мејси да бидат дадени на заем, а младиот Артур Оконково да добие шанса на голот на резервниот тим“, стои во анализата за голманите на лондончани.
Петр Чех заминува во пензија на крајот на сезоната, а емилијано Мартинез ќе се врати од заем во Рединг, па тој би бил втор избор за голман на „Емирати“, зад првотимецот Бернард Лено, кој летоска го засили Арсенал.
Илиев е македонски репрезентативец, кој имаше и голем пех две години да нема настапи поради повреди, а летоска потпиша нов двегодишен договор со „топчиите“. Тој од Беласица направи трансфер во Арсенал и беше дел од младинскиот погон, откако цела година го скенирале скаутите на Арсен Венгер.