Елмас го воодушеви Неапол: На семафори на дете му го даде дуксерот (ВИДЕО)

12 март 2023 - 08:00

Македонскиот „дијамант“ Елиф Елмас кој вчера со асистенција придонесе во победата против Аталанта со 2-0 за Наполи да го продолжи спринтот кон „скудетото“ го воодушеви цел Неапол, со потег кон две деца кои го препознаа во автомобилот во кој беше елмас додека стоеше на семафори.

Откако едното од децата го снимаше Елмас, македонскиот репрезентативец го изненади дополнително. Го соблече дуксерот и му го даде, па остана по кратки ракави во автомобилот, доволно за цел Неапол да се воодушеви од потегот.

„Златното срце на Елмас“, е насловот на низа наполитански медиуми, откако го објавија и видеото.

Македонскиот репрезентативец има шест гола и две асистенции сезонава во Серија А, а Наполи се врати на плус 18 на табелата на 12 кола до крајот на сезоната и веќе невозможно е да ја прокоцка оваа предност, зашто за титула им требаат шест победи до крајот, односно на пола од преостанатите мечеви да триумфираат.

Неапол веќе е западнат во шампионска екстаза и градот ќе експлодира во моментот кога Наполи и официјално ќе стане првак, зашто на титула во Италија се чека повеќе од три децении, од 1990 година и ерата на Диего Марадона.