Дивеењето во Лион скапо ќе ги чини Гендузи и Гринвуд

Фенербахче на гостувањето во Франција славеше со 2-1 и со вкупни 3-2 го елиминираше Лион, со што обезбеди место во лигашката фаза од елитното европско натпреварување. Сепак, големото славје беше засенето од инциденти кои се случија за време и по завршувањето на натпреварот.

Во центарот на вниманието се најдоа Гендузи и Гринвуд, кои според наводите биле инволвирани во провокативни гестови кон навивачите на Лион. Тензиите дополнително ескалирале по последниот свиреж, кога дошло до физичка пресметка во тунелот кон соблекувалните. Гендузи по натпреварот изјави дека тој и неговото семејство биле изложени на навреди од трибините во текот на целиот меч. Францускиот репрезентативец посочи дека провокациите започнале уште пред почетокот на средбата и продолжиле во текот на сите 90 минути.

УЕФА сега треба да ги разгледа сите достапни материјали и околности поврзани со инцидентите. Фенербахче потврди дека е отворена дисциплинска постапка и најави дека ќе ги брани интересите на клубот и своите фудбалери пред надлежните тела на европската фудбалска централа. Засега нема официјална одлука за евентуалните санкции. Сепак, постапката би можела да има последици за Гендузи и Гринвуд, особено имајќи предвид дека Фенербахче се враќа во лигашката фаза на Лигата на шампионите.

Клубот од Истанбул ќе мора да почека на конечната одлука на УЕФА, додека вниманието сега е насочено кон дисциплинските органи кои треба да утврдат дали и какви казни ќе следуваат за учесниците во инцидентите.