Барнли и Чурлинов на поправен за осминафинале во ФА-Купот

28 јануари 2023 - 18:02

Англискиот вторлигаш и лидер во Чемпионшип, Барнли ќе мора на поправен испит да бара осминафинале во ФА-Купот, овојпат на домашен терен, откако денеска одигра реми без голови на гостувањето кај Ипсвич, а дури пет од седумте меча кои се играа во традиционалниот термин за англиски фудбал ќе се преигруваат.

Македонскиот репрезентативец Дарко Чурлинов играше еден час како стартер за Барнли, по што беше заменет, а после еден месец овој клуб не успеа да даде барем еден гол на меч од поразот во Лига-купот од Манчестер јунајтед. Инаку ова е само вторпат Барнли да не даде гол на еден меч во сите натпреварувања, уште од 12 август лани.

Бристол Сити го растури Вест Бромвич со 3-0, а Саутемптон со 2-1 го победи Блекпул за да им се придружи на Лидс, Лестер и Манчестер сити, кои досега обезбедија пласман меѓу 16-те најдобри во најстарото и најмасовно натпреварување на Островот.

Покрај Барнли, на поправен испит и ќе преигруваат Блекбурн и Бирмингем кои ремизираа 2-2, Фулам и Сандерленд после ремито 1-1, откако на гостите на крајот им беше поништен гол, потоа Лутон и Гримзби по ремито 2-2 и Шефилд Венздеј и Флитвуд, откако ремизираа 1-1.