Работнички го закажа мечот со Вардар во термин кога црвено-црните играат ракометна ЛШ!

17 септември 2018 - 15:08

Навивачите на најголемиот македонски спортски бренд Вардар нема да можат да ги изгледаат комплетно претстојните мечеви на ракометниот и фудбалскиот клуб, в сабота, затоа што во само час и половина во распоредот се дуелите на ракометарите во ЛШ против Кристијанштад и на фудбалерите во соседското дерби со Работнички на Националната Арена „Филип Втори“.

Приврзаниците на црвено-црните буквално ќе треба да се клонираат за да можат од почеток да им дадат поддршка на своите миленици. В сабота од 17.30 часот во СЦ „Јане Сандански“ е закажан дуелот на Вардар со Кристијанштад, а по триумфот кај европскиот првак Монпелје за очекување е дека ќе врие како во кошница за да им се помогне на ракометарите да стигнат до втората сезонска победа.

Но, дуелот во скопската населба Аеродром нема ни да заврши, кога на Националната Арена „Филип Втори“ ќе стартува соседското дерби Работнички – Вардар, закажано за 19 часот под рефлектори на најголемиот наш стадион. И сега се поставува прашањето, дали можеше големото соседско дерби да се помести за еден час, па дуелот да се одигра барем пред пристојна бројка на гледачи, кога веќе дуелите од Првата лига барем кога дебармаалци се домаќини на трибините нема жив човек.

Вака, најупорните по мечот со Кристијанштад ќе мора да „трчаат“ за да стигнат на фудбалскиот меч и тоа повеќе од сигурно е дека на стадион ќе стигнат на полувремето. Во некои подобри денови, Вардар ќе организираше превоз за најверните, ама сега во деновиве со финансиските тешкотии на грбот на црвено-црните, таквото сценарио е речиси невозможно, па навивачите ќе мора да се снаоѓаат за да ги гледаат двата меча.