Шкендија ем победи, ем избега: Алими со мајсторски гол го скрши жилавиот Вардар (ВИДЕО)

28 февруари 2021 - 15:54

Актуелниот прволигашки лидер Шкендија со прекрасниот гол од 20 метри на Арменд Алими од слободен удар нешто по еден час игра под Шара, го скрши жилавиот Вардар за триумф со 2-1 и да избега на плус осум бода во трката за титулата во однос на конкурентот Шкупи кој ремизираше без голови со Академија Пандев во денешното 20-то коло во македонската елита.

Шкендија со блесок на еден од клучните фудбалери на Шкендија во изминативе години, успеа да го скрши жилавиот Вардар, кој се покажа дека е тврд орев, но не успеа да се одбрани во клучниот момент кога Алими со прекрасен слободен удар го совлада Филип Илиќ за да ѝ донесе голема победа на Шкендија.

Претходно во една минута прво Шкендија поведе преку Мевљан Мурати, а брзо Мартин Мирчевски за 60-на секунди ги олади фаворитите со гол за израмнување, по што тетовци се обидуваа да нападнат, но вардарци умешно се бранеа и успеваа да ги сопрат сите напади на далеку поквалитениот ривал.

За Шкендија ова е втора пролетна победа со која го продолжуваат маршот кон круната додека Вардар првпат пролетва загуби и шанса за нови бодови повторно ќе бара во тетово веќе во среда со гостување кај Ренова, која по два меча има два порази и е еден од директните конкуренти за опстанокот на црвено-црните. Тетовци со победата сега имаат 45 бода по 20 кола, додека Вардар остана на 26 засега сигурен на средината на табелата.