По четири години Прилеп конечно доби терен за да се игра фудбал (ФОТО)

Реконструкцијата на стадионот која беше поддржана со пари од хет-трик програмата на УЕФА, но заглави со истата скоро четири години од најавата кога тогашниот прв човек Илчо Ѓорѓиоски со општината предводена од тогашниот градоначалник Марјан Ристески го потпишаа договорот, како дел од првиот „инфраструктурен бум“ што го најави куќата на фудбалот.

„Претставници на Фудбалската федерација на Македонија извршија примопредавање со Општина Прилеп после целосното завршување на инфраструктурните работи на стадионот “Гоце Делчев” во Прилеп кои беа во надлежност на ФФМ. Според договорот, сега стадионот е целосно во надлежност на Општина Прилеп. Фудбалската федерација на Македонија со средства од “Хет-трик” програмата на УЕФА го финансираше поставувањето на целосно нова тревна подлога (тревни бусени) со модерен дренажен и систем за наводнување, а исто така, многу значајно е тоа што се постави и целосно ново рефлекторско осветлување и сега на стадионот има можност да се одигруваат и натпревари под рефлектори.

Функционирањето на рефлекторите беше тестирано од страна на инвеститорите и надзорот, и оценката е дека ги исполнуваат критериумите за одигрување на вечерни натпревари. Во договорот со општина Прилеп, општината треба да изгради посебна трафостаница за користење на новото осветлување на стадионот “Гоце Делчев”, а љубителите на фудбалот се надеваат дека во многу скоро време општината ќе го заврши својот дел од работите поврзани со трибините и потрибинскиот простор и конечно стадионот ќе го добие својот вистински фудбалски лик“, објави ФФМ.