Босанецот кој постигна еврогол на Мундијалот ќе игра за Јувентус! (ВИДЕО)

29 јули 2026 - 19:18

Босанскиот репрезентативец Керим Алајбеговиќ, според последните информации на повеќе фудбалски инсајдери кариерата ќе ја продолжи во редовите на италијанскиот гигант Јувентус.

Фабрицио Романо објави дека „старата дама“ ги победила сите конкуренти во трката за потписот на младиот фудбалер, откако претходно го договори и францускиот напаѓач Рандал Коло Муани.

„Преговорите со клубот и со играчот се во тек, со цел Јувентус да ги претрка останатите заинтересирани клубови. Договорот напредува во позитивна насока“, напиша Романо.

Потврда за овие информации пристигна и од германскиот „Скај Спорт“, кој објави дека Алајбеговиќ е на чекор до потпишување договор со торинскиот клуб.

Според истиот извор, Јувентус ќе плати почетни 33 милиони евра, а со предвидените бонуси вредноста на трансферот би можела да достигне 40 милиони евра.

„Остануваат уште неколку детали за трансферот да биде целосно финализиран“, стои во објавата на „Скај Спорт“.

И германскиот новинар Флоријан Плетенберг потврди дека трансферот практично е завршена работа. Според него, во следните денови ќе биде закажан лекарскиот преглед, по што ќе следува и официјалното потпишување на договорот со Јувентус.

Алајбеговиќ на Светското првенство посебно се истакна со голот кој го постигна против Катар кој сигурно беше помеѓу најатрактивните на турнирот.