Спектакл во Синсинати: Познати полуфиналните двојки - има и голема сензација!

Кај мажите ќе има американска пресметка меѓу Брендон Накашима и Френсис Тиафо, додека во второто полуфинале ќе играат Флавио Коболи и Артур Фис. Кај жените, Ига Швјонтек ќе се соочи со Џесика Пегула, а сензацијата Сара Бејлек ќе игра против Кори Гоф.

Најголемо внимание кај мажите привлекува дуелот меѓу Накашима и Тиафо. Накашима продолжува со одличните настапи на тврда подлога, откако неодамна стигна до финалето во Монтреал, а сезонава веќе има 22 победи на хард. Сепак, традицијата е убедливо на страната на Тиафо. Американецот има дури шест победи во седумте досегашни меѓусебни дуели со Накашима. Тиафо до полуфиналето стигна со победа над Италијанецот Лоренцо Музети од 7-6, 7-5.

Вториот полуфинален дуел кај мажите ќе биде пресметка меѓу Флавио Коболи и Артур Фис. Италијанецот за првпат во кариерата обезбеди место во полуфинале на Мастерс 1000, откако по голем пресврт го елиминираше Томи Пол. Фис, пак, продолжува да импресионира со стабилните настапи и во четвртфиналето го совлада Тиаго Аугустин Тиранте.

Кај дамите, Ига Швјонтек продолжува со одличната форма и стигна до серија од 10 последователни победи. Полската тенисерка во четвртфиналето не мораше да го заврши мечот со Елена Рибакина, која се повлече поради повреда. Швјонтек сега ја очекува Џесика Пегула, која во драматичен меч во три сета ја совлада Аманда Анисимова и обезбеди место во полуфиналето.

Но, приказната на турнирот досега е Сара Бејлек. Чехинката приреди голема сензација со елиминацијата на светската број еден Арина Сабаленка, а потоа ја совлада и поранешната шампионка Медисон Кис. Бејлек за прво финале на турнир од оваа категорија ќе се бори против Кори Гоф. Американката, која триумфираше во Синсинати во 2023 година, во четвртфиналето без поголеми проблеми ја совлада Марта Костјук со 6-2, 6-2.