„Ѓоковиќ е опасен за Западот, затоа никој не го сака!“

02 март 2021 - 21:26

Хрватскиот тренер Горан Иванишевиќ зборуваше за неговиот однос со српскиот тенисер Новак Ѓоковиќ, кој пред неколку недели го освои трофејот на Австралијан опен.

Многумина го критикуваа Ѓоковиќ дека измислува повреди и така си игра со неговите противници, на што Иванишевиќ реагираше бурно.

„Кој измислува такво нешто? Човекот води со 2-0 во сетови и ќе измисли повреда за да го добие Тејлор Фриц? Кога некои други ќе го направат тоа, тогаш тоа е херојски чин“, вели Иванишевиќ.

Хрватот опиша дека Ѓоковиќ не го сакаат многу во западните земји и затоа често го критикуваат по медиумите.

„Западот не сака толку моќен човек, кој има армија навивачи и кој го кажува тоа што го мисли. Верува во своите ставови, опасен е за Западот. Војната почна пред Адрија купот, а потоа и несреќниот Ју-Ес опен, па лошото финале на Ролан Гарос, а сега се појави и оваа приказна за повредите“, објаснува тренерот на Ѓоковиќ.