Шаховскиот Клуб Алкалоид повторно на Европскиот Клупски Куп

08 ноември 2019 - 11:39

Шаховскиот Клуб Алкалоид, продолжува со настапите на Европскиот Клупски Куп, што оваа година се одржува од 10 до 16 Ноември во Улцињ, Црна Гора. Во 2016 година Алкалоид го освои Европскиот Клупски Куп и ја понесе титулата Европски Шампион со 12 бодови во седум мечеви, откако запиша пет победи и два нерешени резултати.

Европското клупско злато е освоено во годината кога клубот одбележа 40 години од своето формирање. Во 2017 година ШК Алкалоид продолжи со успешен настап на Европскиот Клупски Куп и во Анталија, Турција од седми до 15 октомври 2017 година, го освои второто место, со освоени 11 бода (пет победи, еден нерешен меч и еден пораз).

Со идентичен скор во 2018 година, т.е. 11 бодови, екипата се најде на делба од трето до шесто место, а по дополнителен критериум шесто место во конечниот пласман.

Во 2019 година клубот се подготвува за настап со осетно изменет состав, без 4 играчи од претходна година. Но, оваа година во составот на екипата е еден од најсилните светски шахисти, велемајсторот од Азербејџан, Шакријар Мамеѓаров, кој настапуваше за Алкалоид во 2007, 2008 и 2009 година.

Боите на Алкалоид продолжуваат да ги бранат и стандардните членови велемајсторите Дмитри Андрејкин од Русија, кој ја предводеше репрезентацијата на Русија до злато на тукушто завршеното Европско Екипно Првенство, како и Јуриј Криворучко од Украина.

Прв пат за Алкалоид ќе настапи шампионот на САД за 2018 година, велемајсторот Сем Шанкленд, стандарден репрезентативец на својата држава и носител на златен олимписки медал од 2018 година. Втор повратник во екипата е велемајсторот од Русија, Ернесто Инаркиев, Европски првак од 2016 година.

Составот на екипата е комплетиран со двајцата најдобри македонски играчи: Трајко Недев и Филип Панчевски. Капитен на екипата е Драгољуб Јаќимовиќ. Со освежен состав, но воедно играчи кои биле дел од овој одличен спортски колектив, Алкалоид ќе продолжи повторно да се бори за Европскиот врв.

Редоследот на играчите со конкретен распоред по табли официјално се објавува на самиот почеток на натпреварите. На Европскиот Клупски Куп оваа година се пријавени досега најголем број учесници и тоа 67 екипи во машка и 14 во женска конкуренција.

Вообичаено, конкуренцијата е многу силна: Медни Всадник Санкт Петербург (минатогодишните шампиони), АВЕ Нови од Чешка (второпласирани 2018 година), Обиетиво Рисаркименто Падова, стандардно при врвот.

Директни конкуренти за медал или т.н. „црвена група“ се четири тимови, но сигурно во борбата ќе се вмешаат првите 10 најдобро рангирани. Се очекува рамноправна и до крај неизвесна борба, со оглед дека турнирот е релативно краток, поточно само седум кола.

ФОТО: ШК Алкалоид